Хоптогинская библиотека

Муус устар 16 күнүгэр, «Төрөөбүт тыл биһигэ» киин ыытар «Эбэ ааҕар» тэрээһин У. Доосо аатынан орто оскуола интернатын иитиллээччилэригэр ыытылынна.

Тэрээһиммит бүгүҥҥү ыалдьыта педагогическай үлэ бэтэрээнэ М.Н. Наумова. Сахалыы куттаах оҕолору иитэр, өбүгэлэрбит өлбөт-сүппэт үтүө үгэстэрин, Ийэ тыл сүөгэйин-сүмэтин, аар айылҕа кистэлэҥнэрин билиһиннэрэр сыалтан бүгүн «Кистэлэҥнээх Саха сирэ» кинигэттэн дьиҥ олоххо буолбут «Чучунаалыын доҕордоһуу» үһүйээни аахта. Миланья Николаевна ааҕарын оҕолор олус сөбүлээн, таттаран иһиттилэр: «Кыыл диэхтэн киһи курдук эрээри, уҥуоҕунан быдан улахан, бигэ киэптээх, сирэйэ үксэ түү, субурхай уһун баттахтаах күтүр. Тымныыттан харыстанан кыыл таба тириитин сүлэн ылан үрдүгэр быраҕынан иккис тирии оҥостор. Кини куолаһын истибит киһи суох эрээри, куттал тирээтэҕинэ сүр улаханнык иһиирэн өстөөҕүн үргүтэрэ биллэр. Оноҕоһу саа-саадах оҥостон бултуур, көмүскэнэр. Саһа үөрүйэх уонна олус түргэнник сүүрэр буолан, дьон хараҕар мээнэ көстүбэт.»

Аар айылҕабыт кистэлэҥнэрин, киһиэхэ туһатын, ону туһанарга харыстабыллаах сыһыан баар эрэ буоллаҕына айылҕа хардарарын өйдөтөр үлэ тохтоло суох барыахтаах. Оҕолорго бу сиэри-туому тиэрдэргэ, олоххо мэлдьи туһанарга биһиги үлэбит туһуланар. Оҕо истибитин-билбитин кинигэттэн ааҕан чиҥэтиэхтээх, төрөөбүт-төрүт тылбытынан суруллубут уус-уран литератураттан холобурдарга олоҕуран билиитэ кэҥиэхтээх. Ол иһин, бу киин үлэтинэн үөрэнэн, оҕолор олоххо туһаналларыгар кинигэни ааҕыы улахан оруоллаах. Онно төһүү күүһүнэн биһиги эбэлэрбит, эһэлэрбит буолаллар.