Хоптогинская библиотека

Республиканскай «КинигэКүүһэ» (#Сила книги) аахсыйа — Саха Сиригэр киэҥник ыытыллар. Ол чэрчитинэн ыалдьыттар (биллиилээх дьон, төрөппүт-учуутал) уһуйаан оҕолоругар эбэтэр оскуола оҕолоругар сөбүлүүр айымньыларын уус-ураннык ааҕан иһитиннэрэллэр, кинигэ туһатын туһунан кэпсииллэр. Бу ааҕыы оҕо болҕомтотун сайыннарар, саҥарар саҥатын байытар, толкуйдуур дьоҕурун кэҥэтэр уонна саҥа тыллары үөрэтэр, истэн өйдүүргэ үөрэтэр. Аахсыйа Сомоҕолоһуу сылыгар ананан ыытылынна.

Олохтоох бибилэтиэкэтэ бу аахсыйаҕа сылын аайы кыттар. Быйылгы тэрээһини «Ыллык» уһуйаан улахан бөлөҕүн оҕолоругар ыытылынна. Ыалдьытынан Дирин народнай тыйаатырын бэтэрээн артыыһа И. В. Тарабукина буолла. Ирина Валентиновна бастаан оҕолору эҕэрдэлээтэ, кинигэни таптыырга, оскуолаҕа киирдэхтэринэ элбэх кинигэни ааҕар буолалларыгар баҕа санаатын эттэ. Е.П. Чехордуна «Мэник-тэник оҕо саас» кинигэтиттэн тэттик кэпсээни аахта. Ааҕыы кэннэ кэпсээн тула ырытыы буолла.