Хоптогинская библиотека

Саҥа үүммүт сылы биһиги, Хоптоҕолор, элбэх ситиһиилээх саҕалаатыбыт. Үүнэр көлүөнэ оҕолорбут, биирдиилээн дьон, тэрилтэлэр ситиһиилэрэ биһигини олуһун үөрдэр, үрдүккэ кынаттыыр.  Олортон биир улахан үлэнэн уонна кыайыынан буолла, СӨ култууратын туйгуна, Хоптоҕо нэһилиэгин бочуоттаах олохтооҕо, краевед Клара Максимовна Тарабукина «Хоптоҕо хоһуун буойуттара» диэн өйдөбүнньүк ахтыы кинигэни хомуйан, таҥан, бэчээттэтэн бар дьонугар бэлэх уунна. Аҕа дойду улуу сэриитигэр кыттыбыт хас биирдии буойуну ааттарын чопчулаан, кинилэр олохторун туһунан чахчылары көрдөөн, ирдэһэн олус улахан үлэни ыытта.

Кинигэбит 2026 сылга Дьокуускай куоракка “Дани-Алмас” кинигэ кыһатыгар 50 ахсаанынан,  барыта 124 страницалаах, сүрдээх тупсаҕай гына оҥоһуллан бэчээттэнэн таҕыста. Киһи таһыттан көрөөт астына, киэн тутта, ытыктыы көрөр кинигэтэ. Кинигэҕэ, 1941-1945сс. Аҕа дойду Улуу сэриитигэр Хоптоҕо уонна 2-с Мэлдьэхси нэһилиэктэриттэн кыттыбыт биир дойдулаахтарбыт тустарынан кэлэр кэнчээри ыччакка билиһиннэрэр сыалтан, үтүө өйдөбүлүнэн, кинилэр олохторун туһунан сырдатылынна.Кинигэҕэ биографическай информациялар, хаартыскалар, буойуттар бойобуой суоллара, наҕараадалара, докумуоннара, көмүллүбүт сирдэрэ, эрдэ хомуйуллубут баар матырыйааллартан, бэчээккэ тахсыбыт кинигэлэртэн сааһыланан, бэтэрээннэр бэйэлэрин уонна кинилэр оҕолорун, чугас аймахтарын ахтыылара киирдилэр. Аан тылы Клара Максимовна уонна «Хоптоҕо нэһилиэгэ» тыа сирин түөлбэтин баһылыга Алексей Леонидович Бурцев суруйдулар. Кинигэ ааҕааччы киэҥ араҥатыгар ананар.

Кинигэбит икки түһүмэхтэн турар.

Бастакы түһүмэххэ Хоптоҕоттон уонна 2-с Мэлдьэхситтэн сэриигэ быhаччы ыҥырыы тутан барбыт уонна сэрии кэмигэр байыаннай чаастарга сулууспалыы сылдьан Арҕаа, Илин фроннарга сэриигэ кыттыбыт, Үлэ фроннарыгар сылдьыбыт биир дойдулаахтарбытын уонна Хоптоҕоттон, Мэлдьэхситтэн төрүттээх атын сиргэ олорон сэриигэ кыттыыны ылбыт дьоммут ааттара – суоллара чуолкайданан киирдилэр.

Иккис салааҕа Сэрииттэн тыыннаах ордон кэлбит Хоптоҕолор, Мэлдьэхсилэр уонна араас сылларга Хоптоҕоҕо кэлэн олохсуйан олорбут, үлэлээбит-хамнаабыт ветераннарбыт тустарынан, кинилэр бэйэлэрин ахтыылара түмүллэн киирдилэр.

Клара Максимовна таһаартарбыт кинигэлэринэн быыстапка туруоруллан, дьон сэҥээриитин ылла.

Аҕа саастаахтартан ахтыы хомуйан, архыыптарга үлэлээн, көмүс тэҥэ көстүбүт күндү чахчылары барытын чөмчөтөн, Хоптоҕо нэһилиэгин былыргытын кэпсиир, үйэлээх өйдөбүнньүк ахтыы кинигэни хомуйан-таҥан оҥорбут киһибитигэр Клара Максимовнаҕа нэһилиэк дьонун-сэргэтин аатыттан барҕа махталбытын тиэрдэбит!