Хоптогинская библиотека

Бүгүн, ыам ыйын 14 күнүгэр, Арассыыйаҕа Норуоттар сомоҕолоһууларын, Саха сиригэр Култуура, Чурапчы улууһугар Оҥорон таһаарыы сылларыгар сөп түбэһиннэрэн, Хоптоҕо нэһилиэгин уран тарбахтааҕа Надежда Ивановна Гоголева «Кыл-сиэл аптаах абылаҥа» диэн бастакы айар быыстапкатын арыллыыта буолан ааста.

Надежда Ивановна 1983 с. от ыйын 13 күнүгэр Хоптоҕо нэһилиэгэр 5 оҕолоох Наталья Константиновна, Иван Иванович Карповтар дьиэ кэргэттэригэр 4-с оҕонон күн сирин көрбүтэ. Оскуолаҕа үөрэнэр сылларыгар “Кыыс Куо” иис куруһуогар, норуот маастара Шестакова Ульяна Андреевнаҕа уһуйуллубута. Бу үөрэнэр кэмигэр элбэх ситиһиилэрдээҕэ, олортон саамай улахан үлэтинэн буолар саахымат панно, бу үлэтэ улууска миэстэлэспитэ. Надежда Ивановна 2007с. Мэҥэ Хаҥалас Матта нэһилиэгиттэн төрүттээх, Егор Егорович Гоголевтыын харахтарынан хайҕаһан, сүрэхтэринэн сөбүлэһэн олохторун холбоон, алта оҕолонон, биһиги нэһилиэк биир бастыҥ, тутаах дьиэ кэргэнэ буолаллар. Егор Егорович эмиэ айылҕаттан бэриллибит уус илиилээх, талба талааннаах, үлэһит үтүөтэ буолар. Кинилэр оҕолорун кыра эрдэхтэриттэн кэрэ эйгэҕэ уһуйаллар. Надежда Ивановна 2016 сылтан кыл-сиэл оҥоһуктары сэргээн, олуһун сөбүлээн ииһин суолун булбута. Кини элбэх көрүү быыстапкаларга, күрэстэргэ олус көхтөөхтүк кыттар, нэһилиэгин, улууһун чиэһин сыл аайы көмүскүүр, ааттатар элбэх ситиһиилэрин туоһу суруктар, добун суруктар туоһулууллар. 

Саха киһитэ барахсан былыр-былыргыттан күн бүгүнүгэр диэри Дьөһөгөй оҕотугар – сылгыга сүгүрүйэр. Киниэхэ ат миинэр миҥэ, көлүллэр көлө, уһун айаҥҥа аргыс-доҕор буоларын таһынан, үүтэ – кырылыы кыынньар кымыс, тириитэ ичигэс таҥас-тэллэх, мааны олбох, кыла-сиэлэ дьикти өҥүнэн дьэрэлийэр сөрүө, бырдахтан-оҥоойуттан көмүскэнэр дэйбиир буолар.

Быыстапка арыллыытыгар элбэх киһи кэлэн тэрийээччилэри, быыстапка ааптарын олуһун үөртэ даҕаны, долгутта даҕаны.

«Кыл-сиэл аптаах абылаҥа» быыстапка Хоптоҕолор түмсүүлээхпитин, кэрэҕэ-үтүөҕэ тардыһыылаахпытын өссө төгүл көрдөрдө, манна эдэриттэн саҕалаан аҕам саастаахха тиийэ бары бииргэ буоллубут.