Хоптогинская библиотека

Кулун тутар 22 күнүгэр Дириҥҥэ кэрэ-бэлиэ күн буолла. Ол курдук, Хоптоҕо нэһилиэгин 3-с кинигэтэ күн сирин көрбүтүн сүрэхтээтибит.
Бары билэрбит курдук бастакы кинигэ нэһилиэкпит 100 сылын көрсө 2014с. бэчээттэнэн тахсыбыта. Бу кинигэҕэ, нэһилиэк биир үйэ устатыгар олорон, үлэлээн, айан-тутан кэлбит историята, дьоно-сэргэтэ, олоҕо-дьаһаҕа сырдатыллыбыта.
Иккис кинигэбит 2017с.  тахсыбыта. Бу кинигэҕэ XX-с үйэ 60-с сылларыттан саҕаламмыт тыа хаһаайыстыбатын холкуостарын бөдөҥсүтүү государственнай политика олоххо киириититтэн саҕалаан, нэһилиэк советскай-партийнай, хаһаайыстыбаннай үлэлэргэ кыттыыта, холкуос-сопхуос үгүс ситиһиилэрэ, үтүөкэн салайааччылара, нэһилиэкпит ытык ыаллара, элбэх оҕолоох герой ийэлэр ордук чорботуллан сырдатыллыбыттара.
Үһүс кинигэбит быйыл олунньу ыйга күн сирин көрдө. Бу хомуурунньук кинигэҕэ Хоптоҕо нэһилиэгин улахан тэрилтэлэрин историялара — оскуола, детсад, балыһа, сельпо, култуура тэрилтэлэрин үлэлэрэ, нэһилиэкпитигэр спорду сайыннарыы, дьон-сэргэ олоҕор-дьаһаҕар үтүө суолталаммыт кыра хааччыйар гос. тэрилтэлэр уонна нэһилиэк общественнай түмсүүлэрэ сиһилии сурулуннулар. Нэһилиэккэ тэриллэ сылдьыбыт Күндүллээҕи инбэлииттэр дьиэлэрэ, туббалыыһа, Улахан Эбэҕэ үлэлээн ааспыт спецоскуола, Дириҥнээҕи детдом үлэлэрэ, үлэһиттэрэ эмиэ кэпсэннилэр. Нэһилиэк туһа диэн олорбут, тэрилтэлэргэ үлэлээбит дьоһун дьоннорбут тустарынан үгүс ахтыылар киирдилэр.

Нэһилиэкпит историятын үйэтитиигэ анал комиссия өр сылларга үлэлээн кэллэ. Комиссия председателэ — СӨ тыатын хаһаайыстыбатын уона СӨ профүөрэхтээһинин туйгуна, СӨ Гражданскай килбиэн бэлиэтин хаһаайына, РФ журналистарын Союһун чилиэнэ, биир дойдулаахпыт, ытыктыыр киһибит МИХАИЛ НИКОЛАЕВИЧ КОРЯКИН.

Кинигэбит сүрэхтэнэр үөрүүлээх чааһын Хоптоҕо нэһилиэгин баһылыга А. Л. Бурцев аста. Салгыы кинигэҕэ үлэлэспит күндү дьоммут үөрэн, долгуйан туран эҕэрдэлэрин, санааларын тиэртилэр:
Капитонова Е. П., Федулова Х. П., Фёдоров П. П. — Сомоҕо,  нэһилиэкпит Ытык кырдьаҕаһа Филиппова А. П., Луковцева А. П., Григорьева А. П., Павлов Д. В., Карпов И. И., Аммосова Н. П., Нахсылова Л. С. уо.д.а.
Билигин үлэлии олорор нэһилиэкпит тэрилтэлэрин салайааччылара, Михаил Николаевичка нэһилиэгин туһугар сүдү үлэтигэр махтаннылар, бэйэлэрин сэмэй бэлэхтэрин туттардылар.

Нэһилиэк бар дьонун аатыттан ытыктабыллаах Михаил Николаевичка барҕа махтал! Кытаанах доруобуйаны, уһун үйэни, дьолу-соргуну баҕарабыт!