Хоптогинская библиотека

Бэс ыйын 12 күнүгэр, Бүтүн Арассыыйа күнүгэр Хоптоҕо нэһилиэгэр биир эмиэ умнуллубат кэрэ-бэлиэ күн буолан ааста. Ол курдук, «Социалистическай куоталаһыы кыайыылааҕар», «Пятилетка ударнигар» — Осиповтар халыҥ аймах Аар тойон аҕаларыгар Николай Петровичка махтанан, үтүө аатын үйэтитэн сурукка-бичиккэ тиһэн кинигэ сүрэхтэниитигэр бар дьоннорун мустулар.

Кинигэ, быйыл 2026 с. Дьокуускай куоракка 80 ахсаанынан таҕыста. Аныгылыы тупсаҕай хаачыстыбалаах оҥоһуулаах, элбэх хаартысканан киэргэтиллибит. Киирии тылы орто кыыһа Галина Николаевна суруйбут. Кинигэ барыта 3 түһүмэхтэн турар: бастакы түһүмэх — Оргунча аҕа ууһун тилиннэрбитэ диэн ааттаах, манна аҕаларын олоҕун, төрүччүлэрин олус сиһилии суруйбуттар. Николай Петрович (Кыппаай) 10 сааһыгар тулаайах хаалан аймахтарыгар иитиллэн киһи-хара буолбутун, ийэлэриниин Екатерина Романовналыын ыал буолан элбэх оҕону төрөтөн, иитэн, үөрэхтээх-үлэһит дьон оҥортообуттарын туһунан ааҕыаххыт. Иккис түһүмэххэ — аймах-хаан дьонун ахтыылара киирбиттэр. Николай Петрович аймахтарыгар өйөбүл-тирэх, сүбэ-ама буолан көмөлөһөр, кинилэр тустарыгар мэлдьи кыһаллар үтүө өрүттэрин киэҥник, дириҥ махталынан сырдаппыттар.   Үһүс түһүмэххэ — үөлээннээхтэрин, ыкса ыалларын ахтыылара киирбиттэр. Манна бииргэ алтыһан үлэлээбит доҕотторун, ыкса ыалларын, дьүөгэлэрин-атастарын истиҥ-иһирэх тыллардаах, киһи долгуйа ааҕар ахтыылара киирбиттэр. Николай Петрович, Хоптоҕо дьонун ахсааннарыгар аата үрдүктүк ааттанарын, олорбут олоҕо, дьаныардаах үлэтэ сыаналанарын бэлиэтээбиттэр.

Кинигэни кыыһа Галина Николаевна уонна уола Роман Николаевич хомуйан оҥордулар.

Төрөппүттэригэр ытыктабылларын биллэрэн оҕолоро, сиэннэрэ, хос сиэннэрэ Өйдөбүнньүк бэлиэ уонна сынньалаҥ сирин үөрүүлээх түгэҥҥэ арыйдылар.

Этэргэ диэри «төрөөтүн кытта хотон түннүгүнэн күрэппит, абааһы ситэн сиэбэтэх» чороҥ соҕотох хаалбыт аҕаларыттан сүүрбэччэ сиэн, биэһэнчэ хос сиэн Эһэлэрин олоҕун салгыыллар, аатын ааттаталлар.