Хоптогинская библиотека

Муус устар 28 күнүгэр, «Төрөөбүт төрүт тылым — төлө туппат төрүт баайым” диэн 2-с кылаас үөрэнээччилэрин төрөппүттэригэр анаан, оҕо  кинигэни ааҕыытын хайдах көҕүлүүр, уһуйар, үөрэтэр сыаллаах-соруктаах тэрээһин ыытылынна.

Төрөппүттэр тэттик сүбэлэри иһиттилэр

1. Бастатан туран төрөппүттэри ааҕарга ыҥырыы, төрөппүт кинигэ ааҕар буолла да, оҕо эмиэ кинигэ тутуурданар.
2. Оҕолордоох ыал дьиэтээҕи  бибилэтиэкэ тэриниэхтээх, оскуола, нэһилиэк бибилэтиэкэлэригэр сылдьыыны дьиэ кэргэн үгэһигэр кубулутуохтаах.
3. Киэһэ аайы дорҕоонноохтук ааҕыы дьиэҕэ олохсуйарын ситиһэргэ, оччоҕо  оҕо  кинигэҕэ     убаныа. Манна кэмин куоттарбат ордук уонна үөрүйэх үөскүүрүн туһугар киэһээҥҥи ааҕыылары үгэскэ кубулутар ордук. Бииргэ ааҕар, кэпсэтэр төрөппүт оҕотун  үөрэтэр, оҕотугар көмөлөһөр, оҕотун  болҕомтотун тардар, үчүгэйгэ сыһыарар, бу маннык алтыһыы хаһан баҕарар үтүөҕэ эрэ тиэрдэр.
4. Оҕо аахпытын  кэпсии үөрэниэхтээх, кэпсиирин   сэргээтэххэ, тэптэрэн  биэрдэххэ, оҕоҕо   интэриэс үөскүүр.

Алын сүһүөх кылаас оҕото ханнык айымньылары ааҕыан сөбүн билиһиннэрэр кинигэ быыстапката турда, сырдатылынна.

Дьиэ кэргэн, оскуола, бибилэтиэкэ — оҕо тула  ааҕар  эйгэни тэрийээччилэринэн   буолаллар. Мантан биирэ эмит болҕомто уурбат түбэлтэтигэр,  оҕоҕо  охсуута   олус    улахан  буоларын өйдүөхтээхпит.