Хоптогинская библиотека

Кинигэ — билии-көрүү бараммат байҕаллара, өй-санаа уостубат кылаата. Киһи аймах көлүөнэттэн көлүөнэҕэ, үйэттэн үйэҕэ муспут баай уоппута, билбитэ-көрбүтэ барыта кинигэҕэ киирэр. Оҕоҕо 3-4 сааһыттан төрөппүт ойуулаах кинигэлэри көрдөрүөхтээх, сороҕун өйтөн ааҕарга, кинигэни харыстыырга үөрэтиэхтээх. Оҕо сылтан сыл истэр дьоҕура сайдар, сатаан ыйытыыга эппиэттиир, ырытыһар, кэпсиир буолар. Кэпсээн геройдарын кытта тэҥҥэ үөрэр, хомойор. Төрөппүт оҕотун кытта бииргэ олорон кинигэни көрөрө, ааҕара — бу оҕо сайдыытыгар олус туһалыыр.

Олунньу 17 күнүгэр «Ыллык» уһуйаан иитиллээччилэригэр «Кинигэлиин билсэбит» библиотека уруога ыытылынна. Манна, уһуйаан икки бөлөх иитиллээччилэрэ, кинигэ диэн тугун, хайдах кинигэлэр баалларын, кинигэни хайдах тутуохтаахтарын туһунан иһиттилэр, биллилэр. Кинигэ быыстапкатын көрдүлэр, кинигэ ойууларыттан билэр остуоруйаларын кэпсээтилэр. Уһуйаан оҕолоро элбэх остуоруйаны, геройдары билэллэрэ, кинигэни сөбүлүүллэрэ тута көһүннэ.