Хоптогинская библиотека

Кулун тутар 15 күнүгэр Хоптоҕо нэһилиэгэр, Арассыыйаҕа норуоттар сомоҕолоһууларын, Саха сиригэр култуура, Чурапчы улууһугар оҥорон таһаарыы сылларын чэрчитинэн, нэһилиэктэр икки ардыларынааҕы «Айхаллан Чурапчы!» улуустааҕы бэстибээл ыытылынна. Быйылгы бэстибээлгэ уус-уран оҥоһуктар быыстапкаларыгар — туос иһиттэргэ, оҥоһуктарга буолла.

Туос — саха киһитин үйэлэргэ аһаппыт-таҥыннарбыт, дьиэтин иһин-таһын киэргэппит, олоҕун арахсыспат аргыһа буолар. Туос иһиттэр, оҥоһуктар — бу өбүгэлэрбит туоһунан иистэммит сатабыллара, уус-уран мындырдара, айылҕаны кытта ыпсыылаах сыһыаннара, олоххо дьулуурдара, сүҥкэн билиилэрэ, кинилэр дууһаларын уотун, сүрэхтэрин сылааһын иҥэрбит дьикти оҥоһуктара буолаллар. хас биирдии оҥоһук тус-туспа кэпсээннээх, бэйэтэ туспа историялаах, бэйэтэ туспа оһуордаах-мандардаах.

Быыстапкабытыгар турдулар:

• дьиэни киэргэтэр симэхтэр
• аһы-үөлү хаһаанарга аналлаах иһиттэр
• күннээҕи олоххо туттуллар араас оҥоһуктар
• уран тарбах табыллыбыт айымньылара. Бу быыстапка биһиги култуурабыт чэчирииригэр, үйэлэргэ умнуллубат үтүө үгэстэрбит кэлэр көлүөнэҕэ тиэрдэргэ улахан көмө буоулуоҕа!

Төрүт култуурабыт үйэлэргэ чэчирии турдун! Туос оҥоһуктарбыт кэрэтинэн, туһатынан биллэ турдунар!