Хоптогинская библиотека

Кулун тутар 28 күнүгэр, Комсомол хамсааһына Саха сиригэр төрүттэммитэ 105 сылыгар аналлаах «Ыстаал кэккэҕэ иитиллибит көлүөнэ» диэн, Дириҥ орто оскуолатын 21-с выпуск комсомолецтарыгар үөрүүлээх тэрээһин ыытылынна.

Комсомол – бу аҥардас тэрилтэ эрэ буолбатах, бу мөлүйүөнүнэн дьон дьылҕата, кэскили кэрэһэлиир уоттаах сүрэх, туруу үлэҕэ бэринии буолара. Комсомол – бу эрэл, дьулуур, биир сомоҕо буолуу бэлиэтэ! Үгүс элбэх дьон, ордук аҕа саастаах уонна орто саастаах көлүөнэ дьылҕата комсомолу кытта ыкса сибээстээх. Комсомолга киирэн ыччат дойду олоҕун бары эйгэтигэр көхтөөхтүк кыттара, норуот бүттүүнүн дьылҕатын иһин эппиэтинэстээҕин билинэрэ.

          Эрилик Эристиин аатынан сопхуос «Хоптоҕо» отделениетын ыччаттара – үлэҕэ, үөрэххэ, ыччат хамсааһыннарыгар, уус-уран самодеятельноска нэһилиэктэригэр, оройуоҥҥа, республикаҕа да өрүү инники кирбиигэ сылдьыбыттара. Ол курдук Хоптоҕо-2 кинигэтигэр уонна биһиги нэһилиэк ытыктыыр киһибит Христина Петровна Федулова «Эрчимнээх эдэр сааспыт комсомол” диэн кинигэтигэр сурулла сылдьаллар. Тэрээһиҥҥэ Дириҥ, Одьулуун, Чурапчы, Мындаҕаайы уонна Мэҥэ Хаҥалас улууһун Майа нэһилиэктэриттэн кыттыыны ыллылар. Бу көлүөнэ ыарахантан чаҕыйбакка, үлэттэн куоппакка, олох хардыытынан күүстэрин уурбуттара, санааларын холбообуттара сыаналанан, сүҥкэн кылааты киллэрбит үлэһит үтүөлэрэ буолан билигин дьон махталын ылан олороллор. Бу дьоро күн, комсомолецтар ааспыт кэмнэрин, хорсуннук-дьулуурдаахтык үлэлээн ааспыт сылларын, Комсомол кэмин романтикатын, эрэлин ахтан-санаан аастыбыт. Тэрээһини Хоптоҕо нэһилиэгин библиотекара тэрийэн ыытта.

«Эн Комсомол — мин дьолум!» кинигэнэн быыстапка туруорулунна. Манна, Чурапчы оройуонун комсомольскай тэрилтэ активистарын, Комсомол ветерааннарын, Комсомол райкомун секретаардарын ахтыылардаах кинигэлэр, Уйбаан Доосо аатынан Дириҥ орто оскуолатын сырдатар «Үөрэх-билии кыһата — 90 сыл» уонна «Алгыстаах алаастан аттанан» кинигэлэр, оскуолаҕа үлэлээбит учууталлар таһааттарбыт кинигэлэрэ уонна 21-с выпуск үөрэнээччилэрэ үлэһит үтүөтэ буолан олороннор төрөөбүт дойдуларын, тапталлаах нэһилиэктэрин, тэрилтэлэрин үйэтитэн, үлэлэһэн таһаарбыт кинигэлэрэ быыстапкаҕа турдулар, киэҥ сэҥээриини ыллылар.

Тэрээһин кыттыылаахтара комсомол сылларын туоһулуур архивнай матырыйааллары, хаартыскалары, наҕараадаларын, комсомольскай билеттарын аҕалан быыстапка туруордулар. Комсомол историятын, комсомолецтар тустарынан киинэлэри төһө өйдүүллэрин тургутан викторинаҕа кытыннылар. Уоттаах-күөстээх комсомольскай мунньахтары санаан тыл этиитигэр уонна Комсомол куруук инники, бастакы күөҥҥэ сылдьарыгар ыҥырыы плакааттары кэпсээһиҥҥэ конкурстар ыытылыннылар.