Хоптогинская библиотека

Уйбаан Доосо аатынан Дириҥ орто Агро оскуолатын үөрэнээччилэригэр тапталлаах дойдубут, нэһилиэкпит төрүттэммит бэлиэ күнүн көрсө «Мин нэһилиэгим — мин киэн туттуум!» диэн өй күрэһэ ыытылынна. Күрэх сыала-соруга: төрөөбүт дойдуну таптыырга, харыстыырга, бэриниилээх буолууга иитии, нэһилиэкпит историятын, историческай түгэннэрин оскуола үөрэнээччилэригэр оонньуу нөҥүө тиэрдии, уус-уран ааҕыыны көҕүлээһин, хамаанданан үлэ буолар. Өй күрэһигэр оскуолабыт улахан сүһүөх оҕолоро — 8а, 8б, 9, 10а, 10б, 11 кылаас үөрэнээччилэрэ кытыннылар. Тэрээһин үөрүүлээх чааһа «Дириҥим, Дириҥим — төлкөлөөх биһигим» диэн кинигэ быыстапкатынан арылынна.

Дьүүллүүр сүбэҕэ «Хоптоҕо нэһилиэгэ» МТ дьиэ кэргэни кытары специалиһа — Андреева Л.Н. (дьүүллүүр сүбэ бэрэссэдээтэлэ), оскуола библиотекара — Сергеева Н.Н., оскуола психолога — Поисеева Е.П. үлэлээтилэр.

Хас биирдии хамаанда олус үчүгэй ааттары хамаандаларыгар ааттанан, биэстии ыйытыктаах 4 түһүмэҕи аастылар. Ол курдук хамаандалар аатарын билиһиннэрэбин: 8а кыл. — Сулустар, 8б кыл — Чолбон, 9 кыл. — Эрилик эрэллэрэ, 10а кыл. — Хоптоҕо хоһууннара, 10б кыл. — Дьоһуннаах Дириҥнэр уонна 11 кыл. — Доосо эрэллэрэ.

Оҕолор олус сөбүлээн, ис сүрэхтэриттэн долгуйан, төрөөбүт дойдуларыгар тапталларын биллэрэн туран кыттыбыттарын түмүгэр:

1 миэстэ 10б кылаас «Дьоһуннаах Дириҥнэр » (кыл. сал Алексеева А.Е.)

2 миэстэ 9 кылаас «Эрилик эрэллэрэ» (кыл. сал. Макарцова И.В.)

3 миэстэ 8а кылаас «Сулустар» (кыл. сал. Федосеева Р.С.)

У. Доосо аатынан Дириҥ орто Агро оскуолатын оҕону иитиигэ директоры солбуйааччы Т. И. Попова, олохтоох библиотека үлэһитигэр, оҕону иитиигэ олус улахан суолталаах тэрээһин буолла диэн махталын тиэртэ.