Хоптогинская библиотека

Бүгүн, ахсынньы 3 күнүгэр, төлкөлөөх биһикпит, тапталлаах Дириҥмит төрөөбүт күнүгэр аналлаах декада чэрчитинэн, нэһилиэкпит устуоруйатын байытан өссө икки саҥа кинигэ күн сирин көрбүттэрин сүрэхтэниитэ буолла.

Быйыл, 2025 сылга, дойду үрдүнэн үгүс үбүлүөйдээх сыл ааһан эрэр. Олортон биир сүдү тэрээһининэн Улуу Кыайыы 80 сылын бэлиэтээбиппит. Бу бэлиэ сылга биһиги нэһилиэк араас хабааннаах үлэлэри ыыттыбыт, олортон биир улахан үлэнэн икки кинигэ тахсыыта буолар.

Бастакы кинигэбит “Сэрии сылын оҕолоро” диэн ааттаах. Кинигэни СӨ култууратын туйгуна, краевед, Хоптоҕо нэһилиэгин бочуоттаах олохтооҕо Клара Максимовна Тарабукина хомуйан-таҥан оҥоттордо. Кини аҕа саастаахтартан ахтыы хомуйан, архыыптарга үлэлээн, көмүс тэҥэ көстүбүт күндү чахчылары барытын чөмчөтөн, Хоптоҕо нэһилиэгин былыргытын кэпсиир киһи киэн туттар, үйэлээх үтүө кинигэ буолбут. Кинигэ 2025 сылга Дьокуускай куоракка “Дани-Алмас” кинигэ кыһатыгар 50 ахсаанынан,  барыта 200 страницалаах, сүрдээх тупсаҕай гына оҥоһуллан бэчээттэнэн таҕыста. Киһи таһыттан көрөөт астына, киэн тутта ытыктыы көрөр кинигэтэ. Кинигэҕэ уоттаах сэрии уорааннаах сылларыгар күн сирин көрбүт сэрии сылын оҕолорун тустарынан кэпсэнэр.

Иккис кинигэбитин А.В. Посельская аатынан Дириҥнээҕи оҕо искусство оскуолатын директора, СӨ култууратын туйгуна Аял Прокопьевич Новгородов «Деятели культуры и искусств из Хоптогинского наслега: преемственность поколений в искусстве» диэн альбом кинигэ. Үлэһит дьону үйэтитэр бэртээхэй өйдөбүнньүк кинигэ буолбут. Кинигэ Дьокуускай куоракка “Дани-Алмас компания” полиграф издательствотыгар быйыл 2025 с. бэчээттэнэн таҕыста. Халыҥ тастаах, 64 страницалаах, 65 устуука экземплярдаах, аныгылыы тупсаҕай хаачыстыбалаах оҥоһуулаах кинигэ буолбут. Кинигэ ааҕааччы киэҥ араҥатыгар ананар. Альбом-кинигэ тиэмэтэ – көлүөнэлэр салҕаныылара буолар. Ол курдук ааспыты, билиҥҥини уонна кэлэр кэми сибээстиир. Кинигэ Чурапчы улууһун Мэлдьэхси уонна Хоптоҕо нэһилиэктэрин култууратын сайыннарыыга, сыаналаммат кылааттарын киллэрбит культура деятэллэрин уонна үлэһиттэрин, чаҕылхай дьоммут көлүөнэлэрин көрдөрөргө ананар. Ол курдук кинигэҕэ киирбиттэр: аар-саарга аатырбыт худуоһунньуктарбыт Петр Петрович Романов, Иннокентий Дмитриевич уолунаан Иннокентий Иннокентьевич Корякиннар, Афанасий Петрович Мунхалов, Надежда Егоровна Федулова, Ким Конфеевич Колесов. Чулуу дьоммут муосчуттар Семен Николаевич Пестерев, Роман Михайлович кыыһынаан Айылгы Муосчут кыыһа Пинигиннар, Георгий Николаевич Родионов. Саха бастакы балерината Аксинья Васильевна кыыһынаан Наталья Семеновна сиэннэрэ Аркадий Посельскайдар, хос-хос сиэннэрэ Алисия Пак, Наташа Посельская уо.д.а.

Кинигэ сүрэхтэниитигэр кэлбит бары дьон олуһун диэн үөрэн, астынан, махатанан туран тыл эттилэр.