Хоптогинская библиотека

Бүгүн, алтынньы 29 күнүгэр нэһилиэкпитигэр Комсомол күнүн бэлиэтээтибит. Айымньылаах үлэҕэ күүстэрин холбообут, төрөөбүт дойдуларын сайдарын туһугар кылааттарын киллэрсибит комсомол ветераннара кыттыыны ыллылар. Үгүс элбэх дьон, ордук аҕа саастаах уонна орто саастаах көлүөнэ дьылҕата комсомолу кытта ыкса сибээстээх. Комсомолга киирэн ыччат дойду олоҕун бары эйгэтигэр көхтөөхтүк кыттара, норуот бүттүүнүн дьылҕатын иһин эппиэтинэстээҕин билинэрэ. Ыарахантан чаҕыйбакка, үлэттэн куоппакка, олох хардыытынан күүстэрин уурбуттара, санааларын холбообуттара сыаналанан, үлэһит үтүөлэрэ буолан билигин дьон махталын ылан олороллор.

Киирии тылы Хоптоҕо нэһилиэгин бочуоттаах олохтооҕо, улуус Бочуоттаах бэтэрээнэ Христина Петровна Федулова эттэ. Эрилик Эристиин аатынан сопхуос ыччаттара үлэҕэ, үөрэххэ, ыччат хамсааһыннарыгар, уус-уран самодеятельноска оройуоҥҥа да, республикаҕа да өрүү инники кирбиигэ сылдьыбыттарын туһунан кэпсээтэ.

         Кинигэ быыстапката туруоруллан сиһилии ырытыллан ыалдьыттар болҕомтолорун татта. Салҕыы комсомол устуоруйатыттан викторина ыытылынна. Манна икки хамаандаҕа арахсан билиилэрин тургуттулар.