Хоптогинская библиотека

Бу күн ытыктабыл уонна аҕа көлүөнэ дьонугар күннэтэ ахсаабат болҕомто, истиҥ кыһамньы уурарбытын санатар ытык күн буолар.

Нэһилиэкпит бибилэтиэкэтигэр «Уруккуну санаһа, эдэр сааһы эргитэ» диэн тэрээһин ыытылынна. Бу үөрүүлээх күҥҥэ урукку кэмҥэ биир сүрүн тэрилтэнэн үлэлээбит — Бытовой комбинат үлэһиттэрэ, Далбар хотун эбээлэр кэлэн, көхтөөх кыттыыны ыллылар. Аҕа саастаах көлүөнэ Сэбиэскэй кэмҥэ үлэлээн, айан-тутан олорон ааспыта. Кинилэр ол эдэр саастара ааспыт кэрдиис кэмнэрин күндүтүк саныыллар, умнубаттар.

Итии чэйдээх остуол тула атах тэпсэн олорон ааспыты ахтыһан, истиҥник кэпсэтэн, инникини былааннаан, библиотекарь бэлэмнээбит викторинатыгар кыттан, хоһоон ааҕан, кинигэ быыстапкатын көрөн астынан тарҕастылар.

Күндү эбээлэрбит, эһээлэрбит! Эһиги олоххо баай көрүүгүт – үөрүйэххит, санааҕыт күүһэ биһиэхэ куруук холобур буолар. Эһиги дьиэ кэргэҥҥит сылаас истиҥ сыһыаныгар угуттанан, өр сылларга этэҥҥэ олоруҥ! Уһун үйэни, чэгиэн доруобуйаны, дьолу – соргуну!