Хоптогинская библиотека

Балаҕан ыйын 24 күнүгэр, Хоптоҕо нэһилиэгэр биир үөрүүлээх түгэн буолла. Ол курдук, 1948-1979 сс. почта начальнигынан үлэлээбит, Василий Васильевич Михайлов төрөөбүтэ 100 сылыгар, кини сырдык кэриэһигэр анаммыт «Дириҥ почтата» диэн брошюра-кинигэ сүрэхтэниитэ буолан ааста. Кинигэни В.В. Михайлов төрөппүт кыыһа, СР, РФ доруобуйа харыстабылын туйгуна Васса Васильевна Михайлова таһааттарда. Кинигэ аҕата суруйан хаалларбыт ахтыыларыгар олоҕуран суруллубут.

Бу дьоро, бэлиэ күҥҥэ нэһилиэкпит кыраайы үөрэтээччилэрэ уонна В.В. Михайловы кытта бииргэ үлэлээн ааспыт кэллиэгэлэрин оҕолоро, сиэттэрэ кыттыыны ыллылар. Кинигэ сүрэхтэниитигэр мустубут ыалдьыттар истиҥ, иһирэх оҕо саас өйдөбүллэрэ, ол кэмнэри ахтан-санаан үөрүү аргыстаах ахтылҕан кэмҥэ куустаран ыллылар. Васса Васильевнаҕа дьон махтанар тылларын анаатылар. Үөрүүлээх күн уопсай хаартыскаҕа түһүүнэн түмүктэннэ.

Кинигэ Хоптоҕо нэһилиэгэр биир бэлиэ киһи үлэлээн, олорон ааспытын санатан, кини аата иккистээн тыыннанан, кэлэр көлүөнэ ыччат историяны билэригэр көмө буоларыгар эрэнэбит.