Хоптогинская библиотека

Ыам ыйын 6 күнүгэр, Хоптоҕо нэһилиэгэр үөрүүлээх дьаһал ыытылынна. Ол курдук, үлэ, тыыл бэтэрээнэ, хоту көһөрүллүү кыттыылааҕа, Хоптоҕо нэһилиэгин бочуоттаах олохтооҕо Николай Гаврильевич уонна үлэ бэтэрээнэ, «Материнская слава» орден 1, 2, 3 стиэпэннэрин хаһаайката Мария Васильевна Федуловтар оҕолоро, сиэттэрэ Улуу Кыайыы 80 сылынан, Кыайыы скверыгар өйдөбүнньүк икки скамейканы төрөөбүт нэһилиэктэригэр бэлэх ууннулар. Федуловтар «80 үтүө дьыала» бачыымы өйөөннөр, бука бары биир санааҕа киирэннэр, төрөппүттэрин үтүө ааттарын үйэтиттилэр. Манна даҕатан эттэххэ, бу 1975 с. Кыайыы 30 сылыгар оҥоһуллубут памятник күрүөтүн, аҕалара Николай Гаврильевич сваркалаан оҥорбута.

Хоптоҕо нэһилиэгин баһылыга А. Л. Бурцев, маннык кэрэ оҥоһуулаах бэлэҕи тутан, Федуловтар халыҥ аймахха барҕа махтал тылларын, үтүө санаатын эттэ.