Хоптогинская библиотека

Аҕа дойду Улуу сэриитин былаһын тухары фронт уонна тыыл биир сомоҕо буолан, Улуу Кыайыы ситиһиллибитэ. Саха сирин дьоно бука бары — оҕонньордуун-эмээхсинниин, оҕолуун-дьахтардыын сэриигэ барбыт ньургун уолаттарын, аҕаларын, убайдарын солбуйан, туох баар кыахтарынан, күүстэринэн, өлөллөрүн-сүтэллэрин кэрэйбэккэ Кыайыы туһа диэн үлэлээбиттэрэ. Оччотооҕуга тыылга хаалбыт дьон саа тутан сэриилэспэтэхтэрин да иһин, тыылга олорон бириэмэ ыар тыынын, эрэйин-муҥун, өлүүнү-сүтүүнү, хас биирдии ыал олоҕо алларыйбытын, чугас аймаҕы, билэр дьоннорун сэриигэ сүтэриини эттэринэн-хааннарынан, өйдөрүнэн-санааларынан билбиттэрэ.

1941 сыллаахха Мэлдьэхсигэ «Тахсыбыт Сардаҥа», «Кыһыл сис», Ленин аатынан, онтон Хоптоҕоҕо — «Хопто», Андреев аатынан холкуостар сэрии саҕаланаатын кытта оборуона, кыайыы фондаларыгар үбү-харчыны хомуйан бойобуой техника, сэрии сэбин оҥоруутугар көмөлөспүттэрэ, фронт дьонун аһынан-үөлүнэн хааччыйыыга, сүөһү иитиитигэр, бурдук, оҕуруот аһын үүннэриигэ күүскэ туруммуттара.

Сэриини кытта силбэһэ өр сыллаах кураан туран, дьон-сэргэ олоҕор ыар мэҥэһик буолбута. Дьон сутааһына, хоргуйан өлүүтэ саҕаламмыта. Сир-дойду саһара хаппыта, тимир тиистээх аһыҥа хара былыттыы көтөн, сиртэн быкпыт күөҕү ньимси бараабыта, бурдугу туруоран эрэ кэрбээбитэ. Сүөһү-ас ииттэр ыараабыта, аһыыр ас мөлтөөбүтэ. Атырдьах ыйын 11 күнүгэр партия обкомун бюротун 231 №-дээх уурааҕынан Чурапчы оройуонун 41 холкуоһун хоту оройуоннарга балык бултааһыныгар күүс өттүнэн көһөрбүттэрэ. Олор истэригэр Мэлдьэхситтэн «Кыһыл сис», Ленин аатынан, Хоптоҕоттон Андреев аатынан холкуостар хабыллан бүтүн дьиэ кэргэнинэн көһөргө күһэллибиттэрэ.

Күн-дьыл ааһан иһэр. Билигин Хоптоҕо нэһилиэгэр сэрии алдьархайын билбит тыыл бэтэрээннэриттэн, сэрии сылын оҕолоруттан тарбахха баттанар аҕыйах киһи хаалла.

Аҕа дойду Улуу сэриитигэр, тыылга Улуу Кыайыыны уһансыбыт биир дойдулаахтарбытын, өбүгэлэрбитин үйэтитэр, кинилэри ытыктаан кэриэстиир, сүгүрүйэ махтанар ытык иэспит буоларын умнумуоҕуҥ. Кинилэргэ, ытык дьоммутугар — үйэлэргэ Албан аат!