Хоптогинская библиотека

Аҕа дойду Улуу сэриитигэр Кыайыы символлара дойдубут хас биирдии олохтооҕор улахан суолталаахтар. Символлар биһиги норуоппут геройдуу олоҕун туоһулара буолаллар. Улуу Кыайыы 80 сылын көрсө, Дириҥнээҕи орто оскуола алын сүһүөх (1, 2, 3, 4 кыл) үөрэнээччилэригэр, олохтоох библиотека «Кыайыы символлара» диэн тэрээһин ыытта. Олохторун толук ууран туран кыргыспыт Советскай норуот хорсун быһыытын үүнэр көлүөнэ ыччат билиэхтээх, киэн туттуохтаах.

Тэрээһин сыала — Аҕа дойду Улуу сэриитигэр Кыайыы символлара улахан оруолу ылбыттарын оҕолорго тиэрдии, үөрэтии.

Оҕолор элбэх символлары биллилэр, ол курдук, Кыайыы Знамята, Георгиевскай лента, Умуллубат Уоту, Т-34 таанканы, Катюша бойобуой массыынаны, Үс муннук суругу, Кыһыл гвоздиканы уо.д.а. Аҕа дойду Улуу сэриитигэр аналлаах кинигэлэри кытта билистилэр.

Тэрээһин түмүктүүр чааһынан Кыайыы символын гвоздиканы оҥорууга маастар кылаас ыытылынна, хас биирдии үөрэнээччи көхтөөх кыттыыны ылла.